បាត់ដំបង៖ ក្រុមគ្រូពេទ្យ និងមន្ត្រីជួរមុខ ដែលប្រឈមនឹងហានិភ័យនៃការឆ្លងជំងឺកូវីដ-១៩ បំប្លែងថ្មី Delta នឹងត្រូវទទួលបានការចាក់វ៉ាក់សាំងជំរុញ ឬហៅថាដូសទី៣ ការពារជំងឺកូវីដ-១៩ ប្រភេទ AstraZeneca ចំនួន ២០,០៧៣ដូស ដែលបានដឹកតាមឧទ្ធម្ភាគចក្រដល់ខេត្តបាត់ដំបងហើយ នៅព្រឹកថ្ងៃទី៧ ខែសីហា ឆ្នាំ២០២១ ក្រោយការប្រកាសរបស់នាយករដ្ឋមន្ត្រីកម្ពុជាសម្តេច តេជោ ហ៊ុន សែន បន្ទាប់ពីមានពលករខ្មែរជាច្រើននាក់ត្រឡប់មកពីប្រទេសថៃវិញ។

ប្រធានមន្ទីរសុខាភិបាលខេត្តបាត់ដំបងលោកឱសថបណ្ឌិត វឿង ប៊ុនរ៉េត បានចេញទៅទទួលវ៉ាក់សាំងនោះ។ លោកឱសថបណ្ឌិត វឿង ប៊ុនរ៉េត បានឱ្យដឹងថា ការរៀបចំចាក់វ៉ាក់សាំងដូសលើកទី៣នេះ គឺអនុគណៈកម្មការរៀបចំចាក់ជូនមន្ត្រីជួរមុខមុនគេ ដើម្បីបង្កើនប្រសិទ្ធភាពក្នុងការការពារការឆ្លងជំងឺកូវីដ-១៩ ពីព្រោះកងកម្លាំងមានភារកាតព្វកិច្ចការពារខ្សែក្រវ៉ាត់ព្រំដែនកម្ពុជា-ថៃ ដែលមន្ត្រីជួរមុខទាំងអស់នោះ គឺគាត់មានការប្រឈមខ្លាំងជាងគេក្នុងការដែលពលករខ្មែរវិលត្រឡប់ពីប្រទេសថៃចូលស្រុកវិញ។

យុទ្ធនាការចាក់វ៉ាក់សាំងដូសទី៣នេះ នឹងប្រព្រឹត្តទៅនៅថ្ងៃអាទិត្យ ទី៨ ស្របទៅតាមគោលនយោបាយរបស់រាជរដ្ឋាភិបាល និងក្រសួងសុខាភិបាលដើម្បីទាន់ពេលវេលានិងទប់ស្កាត់ការឆ្លងជំងឺកូវីដ-១៩ចូលក្នុងសហគមន៍៕